好多人聽到「蟲」字已經怕怕，更何況要佢哋放入口品嘗，但身為男子漢無理由被區區一兩條蟲蟲嚇窒，而且有種蟲對補腎好有益，佢就係沙蟲喇！
沙蟲又名沙腸子、沙腸蟲、海人參，形狀好似一條腸，屬於海洋軟體動物，雖然賣相唔多討好，但食療價值相當高，功效不下於海參、魚翅等名貴海產，所以又有「海洋蟲草」之稱。
沙蟲含豐富營養，包括蛋白質、多肽成分、多達17種氨基酸，仲有鋅、錳、鈣、磷、鐵、鎂等12種微量元素，所以對身體好有益，可以降血脂、抗氧化、抗疲勞、調節免疫、延緩衰老等。喺中醫角度，沙蟲功效包括滋陰降火、清肺補虛等，對於應付腎虛腰痛、陰虛勞損有相當作用。
沙蟲一般會曬成乾，味道鮮美脆嫩，食用前可先以凍水將佢浸至軟身，之後將佢剪開，清走沙囊，即可用嚟煲湯或入饌。另外，新鮮沙蟲可以用嚟爆炒，或炮製福建名菜土筍凍。