四大海味「鮑、參、翅、肚」一向都被認為係名貴佳餚，當中除咗魚翅之外，其餘三種都具有豐富營養價值，而海參對男人仲相當有益添！佢別名刺參、遼參、沙噀、海男子，味甘、鹹，性平，歸腎、肺經，據《本草從新》記載：「海參補腎益精，壯陽療痿。」具有治療精血虧損、陽痿、夢遺、小便頻數、虛弱勞怯等功效，經常食用，頗有裨益。
海參除咗具有藥用價值，其食療價值亦相當高，因為佢含有豐富蛋白質及膠原蛋白，可以令肌膚嫩滑，兼且有助消除皺紋和面部色斑嘅作用，而且仲含有18種氨基酸、牛磺酸、黏多糖、硫酸軟骨素，以及多種維他命、鈣、鐵等微量元素，有助增強細胞活性，達到提高人體免疫力嘅效果。