廣告有名人效應，但點估得到中國古籍上記載嘅治療陽痿藥方，居然已經識得用名人效應呢招？講緊嘅就係出自北宋陳希夷所著《房術玄機中萃纂要》中嘅「西施受寵丹」。
春秋時期憑傾國傾城美貌紅極一時嘅西施，一直係古代男士心目中女神嘅象徵，故此先至有呢道「西施受寵丹」嘅藥方出現，只係佢嘅材料有乜呢？原來相當簡單，分別有菟絲子、韭子、益智仁、茴香子及蛇床子。
做法係將上述所有材料烘乾後磨成細末，再以酒糊成小丸狀，每次服用50至70粒，並以鹽湯送服。據稱具有溫腎壯陽嘅功效，並對治療因腎陽虧虛所導致嘅陽痿、腰膝痠軟、頭暈耳鳴、遺精早洩等症狀均有一定作用。