站喺健康角度，唔熟唔食係一種正確態度，一來唔熟嘅生果好難食，二來唔熟嘅肉類好易食到生蟲，而今次介紹嘅藥材，同樣係「熟」比「生」更有益，尤其係對需要補腎益精嘅男人嚟講，呢味藥材就係熟地黃！
熟地黃又名熟地，係玄參科植物地黃嘅塊根，乾燥之後未加工就叫生地黃，經加工炮製就成為熟地黃，藥性就會由微寒轉為微溫，補益功效亦同時大大增強。
熟地黃味甘，性微溫，歸肝、腎經，功效包括補血滋陰、益精填髓，對男人補身相當有效！據《珍珠囊》指出，熟地黃「主補血氣，滋腎水，益真陰。」另外，《本草綱目》就有以下記載：「填骨髓，長肌肉，生精血，補五臟內傷不足，通血脈，利耳目，黑鬚髮。」
用於應付由腎陰不足而引起嘅遺精、消渴、盜汗等毛病，熟地黃作為滋陰主藥，可跟山萸肉、山藥等同用，製成六味地黃丸。
用於應付因肝腎精血虧虛引起嘅腰膝痠軟、鬚髮早白、眩暈耳鳴，則可將熟地黃、制何首烏、枸杞子、菟絲子等藥材加埋一齊用，可補精血、烏鬚髮。