「神仙粥」究竟係咩料呢？原來佢收錄喺敦煌石窟出土嘅文卷中，報稱具有補腎壯陽、補虛及止泄精作用嘅粥品，真係好神奇呀！材料分別係淮山一斤、芡實半斤、梗米半斤，做法係先將淮山蒸熟後去皮，芡實則煮熟去殼再搗成末狀，將上述兩種材料放入鍋內後加入梗米，放入水後慢火煮成粥，空肚食用。如果加韭菜子所搗成嘅粉末兩至三両，效果更好，食粥後，再飲三杯熱酒效用更妙。文卷中稱：「神仙粥善補虛勞，益氣強志，壯元陽、止泄精，神妙。」當中所講嘅壯元陽及止泄精，男士係咪心領神會呢？
事實上，從中醫角度嚟睇，呢道粥嘅材料確實對男士雄風有補助作用，據秦漢時期所著嘅《神農本草經》中指芡實：「益精氣，令耳目聰明，久服輕身不飢，耐老神仙。」實為補中上品。韭菜子則具有補腎助陽、固精止遺及健脾暖胃嘅作用，由此可見「神仙粥」對男士壯陽有一定嘅效用。