之前講過按摩有助增強腎氣，當然要搵啱穴位先得，而今次介紹嘅太溪穴，就係腎臟原氣居住之處，係補腎嘅重要穴位！
中醫認為腎藏精，係人體生命活動嘅原動力，亦係生長發育同生殖之源，所以要壯陽就要先補腎。太溪穴係足少陰原穴，其位置喺足內側，腳內踝與筋腱之間嘅凹陷處，左右腳各有一個。據中醫典籍《九針十二原》提到：「腎也，其原出於太溪穴」，換句話講，屬於原穴嘅太溪穴係腎臟原氣居住之處，腎經嘅原發力同原動力都喺晒呢度。
太溪穴係腎經經氣最旺之處，被古人稱為「回陽九穴之一」，為補腎嘅首選大穴，刺激呢個穴位就可以激發同調動全身腎氣，滋養體內陰液，從而達到滋陰補腎嘅效果。
通常都係採用正坐、平放足底又或者仰臥嘅姿勢，然後用指頭按壓位於足內側，內踝後方，內踝尖與筋腱之間嘅凹陷處，每次5分鐘左右，建議喺下午5點至7點按摩，因為呢個時段屬於腎經流注嘅時間，效果最佳。