年紀大咗，體力大不如前，床上表現自然好極有限！但其實呢種情況好可能因為身體唔夠強壯又唔夠氣，呢個時候食吓黨參補番條氣，令氣血旺盛番，就能夠重振雄風，上到床自然揮灑自如，勁度十足！
黨參為桔梗科多年生草本植物，種類繁多，有黨參、素花黨參、管花黨參、球花黨參等等，主要產於山西、陝西、甘肅、四川等省份，其名目亦受產地影響而有所不同，比較常見嘅有西黨參、東黨參、上黨參、潞黨參、台黨參等等。
黨參味甘，性平，歸脾、肺經，功效與人參相似。據《本草從新》記載：「（黨參）主補中益氣，和脾胃，除煩渴。中氣微弱，用以調補，甚為平妥。」另外，據《本草正義》記載，黨參能補脾養胃、潤肺生津、健運中氣，而最難得嘅係，呢種補益藥「健脾而不燥；滋胃陰而不濕；潤肺而不犯寒涼；養血而不偏滋膩，鼓舞清陽，振動中氣而無剛燥之弊」。不過，黨參始終係中藥，唔係人人啱食，氣滯、肝火盛者禁用，所以服用之前，最好先請教註冊中醫師。
講到黨參，坊間流傳一則故事。話說位列八仙嘅呂洞賓同鐵拐李曾經去到太行山雲遊，意外發現一種貌似豆秧嘅植物，後者將佢放入口中咀嚼，繼續趕路……行咗一段時間，呂洞賓喘晒氣，鐵拐李卻神情自如，於是二人向路過嘅樵夫查問，對方話呢種植物係一種神草，因出自上黨郡，所以又叫「黨參」。