辣得有層次嘅麻辣口味，係好多港人嘅至愛，無論火鍋、雞煲、米線、雞翼，以至薯片，都咁受歡迎，而用嚟炮製呢種獨特口感嘅花椒，除咗會刺激大家嘅舌頭，原來對男人都有一定補益作用，辣啲都要試吓。
花椒又叫川椒、紅椒、蜀椒，古代中醫藥典籍《神農本草經》已有相關記載：「蜀椒為中品，味辛、溫，主治邪氣咳逆，溫中，逐骨節皮膚死肌，寒濕痹痛，下氣，久服之頭不白。」另一典籍《本草綱目》則指出花椒嘅功效包括「散寒除濕，解鬱結，消宿食，通三焦，溫脾胃，補右腎命門，殺蛔蟲，止泄瀉。」根據以上記載，有人認為花椒係純陽之物，可以幫助人體驅除寒氣，仲可以補充腎臟嘅陽氣。
事實上，現代研究顯示，花椒有鎮痛、鎮靜等藥理作用，亦可以溫腎助陽，配合肉桂、小茴香、乾薑、丁香等，更加可以治療腎陽不足、腰膝冷痛、四肢不溫等病症。
除咗入藥或用作調味，花椒仲可以外用，事關佢具有抗菌消炎作用。做法好簡單，以花椒煎水，再用嚟洗刷皮膚表面，可治療痕癢、腳汗、腳癬、凍瘡等，單味使用或配合艾葉、苦參、白鮮皮亦可。