「黑芝麻，嘩！白芝麻，嘩！黑芝麻，白芝麻，嘩嘩！」唔知大家有冇猜過呢種枚呢？提到黑芝麻，原來食落肚好有益，而且對於男士嚟講，佢嘅補益效果，真係聽到人嘩嘩聲！
黑芝麻有多個別名，包括胡麻、油麻、巨勝、脂麻等等，為一年生草本植物脂麻嘅成熟種子，喺中國各地都有栽培。
喺中醫學上，黑芝麻味甘，性平，不寒不熱，歸肝、腎、大腸經，功效包括補肝腎、滋五臟、益精血、長肌肉、填腦髓、潤腸燥等等，可用於改善因肝腎精血不足所致嘅眩暈、脫髮、鬚髮早白、腰痠腿軟、五臟虛損等問題，係男士保健嘅佳品。另外，有指心、肺、肝、脾等臟腑皆靠腎氣去運行，所以食黑芝麻補腎，對於體內嘅其餘臟腑都有助益。
咪睇黑芝麻細細粒，原來蘊含豐富營養，包括蛋白質、不飽和脂肪酸、維他命E、維他命B1，以及多種人體必需嘅胺基酸。其中維他命E除了具有良好嘅抗氧化作用，促進人體嘅代謝功能，仲可以促進人體嘅生育機能，使精子數量生成增加、精子活力增強。所以話，男士們不妨食多兩碗芝麻糊。