芹菜係天使定惡魔？

實驗結果大不同

關於芹菜殺精嘅問題，據稱最早嚟自1979年泰國嘅一項研究，表示食得多芹菜會抑制睾丸酮產生，令精子數量減少。2007年內地有大學將芹菜汁連續28日餵食小鼠，發現精子活躍度及密度均下降，但同一大學喺2009年進行嘅另一實驗，以同樣方法餵食小鼠，卻發現精子並未受到影響之餘，服用大劑量芹菜汁嘅小鼠，精子嘅密度反而提升。

古西方視為催情妙品

早喺古希臘及古羅馬時期，芹菜被視為壯陽食品，所以古希臘時嘅僧侶因此而禁食芹菜。其實亦不無道理，原來芹菜含有大量雄甾酮（Androsterone），作為低雄激素活性類固醇賀爾蒙嘅佢，具有一定刺激性慾及提升性能力作用，而古代西方人更認為芹菜散發嘅氣味，能令男女情慾大振。

榨汁好飲又助性

將芹菜榨汁嘅原因，係因為有啲人唔鍾意芹菜嘅口感，榨成汁嘅話，據稱對性生活有相當唔錯嘅效果。事實上，每100克芹菜中含有蛋白質2.2克、磷61毫克、鈣8.5毫克、鐵8.5毫克，仲有豐富嘅胡蘿蔔素及多種維他命，蛋白質含量更比一般瓜果蔬菜高1倍！不過大家要留意，記得連芹葉一齊食，因為芹葉嘅營養成分比芹莖更多。