乜嘢最刺激味蕾？辣椒都算係數一數二，除咗可以令人心跳加速、頭頂冒汗之外，勢估唔到，呢款貌似男士兵器嘅食材，仲有壯陽嘅效果，果然夠激！究竟辣椒可以喺邊方面提升性趣？即刻同大家數一數。
辣椒之所以同壯陽扯上關係，可追溯至15世紀中美洲國家阿茲特克帝國，當時嘅國王蒙特祖馬二世認為飲用一種混有可可豆、辣椒同香料嘅飲料「Xocoatl」，能令自己充滿雄風。雖然後人覺得可可豆先係呢種飲料能夠壯陽嘅關鍵，但其實都唔能夠忽略辣椒嘅作用，事關辣椒素能刺激內啡肽分泌，可令人產生愉悅感，所以對燃起情慾有一定幫助。
有研究指，食用辣椒，有助吸引異性，原因係辣椒素會令體溫升高，繼而令嘴唇及臉頰泛紅，睇落更加迷人。
辣椒含有豐富維他命C，呢種營養素能令精子充滿活力，從而提升精子質量，換句話講，性能力都會得到增強。
嗜辣嘅女士有唔少，但原來辣味可以減輕女士喺性愛時產生嘅疼痛感。呢個結論出自墨西哥一項研究，參與者分為3組，各自食用唔同分量嘅辣椒，結果發現每星期食一份辣椒，忍痛度可提32.6%至43.8%！但要補充一句，有關結果仍有待更深入嘅研究。