無花果營養豐富，又有「生命之果」之稱，喺日本更稱為「長壽水果」，原來佢仲有壯陽嘅效果！學名「Ficus Carica」，早喺公元前2400年嘅埃及已有種植，後經敍利亞、土耳其，於唐代傳到中國，為桑科榕屬嘅植物，而佢嘅果實被廣泛食用，至於其壯陽之謎又點嚟嘅呢？
據稱古時中東人認為無花果外形跟睾丸相似，而結果時亦係成雙成對，加上果內又有大量種子，故此便產生提升男性雄風嘅說法。有趣嘅係，有人認為無花果貌似女性子宮，故對女性嘅性慾及生育亦有幫助。
無花果含有膳食纖維、鈣、銅、鎂、錳、鉀、維他命K等，仲含有多種抗氧化劑、黃酮及多酚，而壯陽嘅關鍵就在於黃酮，據稱具有調節性腺功能嘅作用，尤其因壓力過大，而引起嘅自律神經失調性功能障礙，有一定嘅作用。此外，佢嘅多元成分更係對提升精子活力有幫助。
既然從科學角度，可以解釋到無花果壯陽嘅迷思，咁點食用先至可以有效壯雄風呢？依家就教大家做個好簡單嘅無花果糖水，先準備新鮮嘅無花果，洗乾淨後去皮，將果肉放入碗內，加上適量冰糖及水拎去燉，呢碗糖水便能喚起男士雄風！