核桃可以治夜尿嘅講法，唔少人都聽過，但你又知唔知呢種食物仲可以用嚟對付陽痿呢？
英文名叫「Walnut」嘅核桃，又稱胡桃，屬喬木科植物的核果類堅果，特性係粗生粗養，而美國加州因為陽光充足、雨水適中，係盛產優質核桃嘅地方之一。由於核桃有豐富嘅蛋白質同亞油酸甘油脂，可以為大腦提供養分，有補腦效果，而喺壯陽方面，中、西醫都有相關嘅研究。
據清代黃宮繡編撰嘅《本草求真》記載：「（核桃）溫補命門，澀精固氣。」可用於治療腎陽不足、腰膝痠痛、陽痿遺精等。清代張錫純編著嘅《醫學衷中參西錄》更指出核桃「最能補腎。」若配以益智仁、菟絲子，更具有治療陽痿遺精嘅作用。
據美國生殖生物學會會刊《生殖生物學》雜誌刊登嘅研究發現，核桃對提升男性生育能力有顯著作用。有研究搵嚟117位年齡介乎21歲至35歲嘅健康男性參與，分為兩組，其中一組被安排每日食用75克核桃，其他飲食習慣相同，12個禮拜之後發現，食用核桃嘅一組男士，精子質量有所提升。
有需要嘅男士可以調製治療陽痿嘅沖劑，做法係先準備補骨脂100克、核桃200克同蜂蜜100克。將補骨脂用酒撈勻，蒸熟並曬乾後，再將佢碾成粉末。核桃則先碾成泥狀，加入蜂蜜煮熟，再加入補骨脂粉並拌勻，放涼後入樽。每次服用時取出10克，加入黃酒調服，每日兩次便可。唔飲酒嘅人士，可用清水代替。不過，要提提大家，每個人嘅體質都唔同，所以喺食用前一定要諮詢專業人士！