如果有見過新鮮金櫻子嘅果實，可能會畀佢帶有刺毛嘅外表嚇親，但喺中醫學角度佢原來有補腎、固精等嘅功效o架！學名「Rosa Laevigata」，又稱「刺梨子」，為薔薇科常綠灌木，其果實可以入藥。
金櫻子味酸、澀，性平、溫，療脾泄下痢，止小便利，澀精氣。所謂嘅澀精氣，即係治療男士因腎虛而導致嘅遺精，同時具有治療尿頻嘅功效，對男性腎虛者最為合適。
含有蘋果酸、枸櫞酸、鞣質、樹脂、維他命C、果糖、蔗糖、皂苷等成分，據稱金櫻子中所含嘅超氧化物，有助去除血管中嘅自由基，從而令血管變得通暢，而佢含有嘅脂肪酸和皂苷，可降低血脂，有助預防心腦血管疾病。
準備金櫻子50克及粳米200克，將金櫻子放入煲內並加入500毫升水，用細火煮至水量剩低200毫升，然後過渣留下湯水並加入粳米。加入500毫升水後熬煮，煮到自己鍾意嘅稠度便可食用。據稱呢煲粥具有收澀、固精、止瀉、小便頻密等嘅作用。不過要留意，如果感冒初期或發燒人士就不適宜食用。