婚宴嘅餐單好多時都有蓮子百合紅豆沙，事關呢款甜品好有意頭，其中蓮子就有「年生貴子」嘅寓意，但大家有冇諗過呢種食材真係對生仔有幫助呢？
蓮子係睡蓮科多年生水生草本植物——蓮嘅種子，以中國蓮子嚟講，主要產地為湖南、福建、江蘇、浙江及南方各地池沼湖塘。喺中醫學角度，蓮子味甘性平，歸脾、腎、心經，有益腎固精、滋補元氣、補脾止瀉等功效，而據古代中醫藥典籍《本草綱目》記載，蓮子能「固精氣，強筋骨，補虛損」，見到嘛，益精喎！咁咪有利於生兒育女囉！
‧針對腎虛遺精
可與芡實、龍骨等同用。
‧針對脾虛久瀉
與黨參、茯苓、白朮同用，可補益脾氣，澀腸止瀉。
‧針對固澀止帶
可與茯苓、白朮等同用。
‧針對虛煩心悸
與酸棗仁、茯神、遠志等同用，可養心益腎。
相傳多食蓮子可以返老還童、長生不老，呢個講法係就係誇張咗啲，但其實佢嘅營養價值真係幾高吓，除咗有大量澱粉，仲含有β-谷甾醇、生物鹼、維他命，同埋豐富礦物質，每100克蓮子就蘊含89毫克鈣、285毫克磷！
蓮子嘅烹調方法相當多，一般可以用嚟煲湯煮糖水，清炒木耳蜜糖豆亦可以加入蓮子，甚至有人用嚟炮製椒鹽蓮子添！