曳曳前一定要飲
昔日墨西哥阿茲特克國王蒙特蘇馬二世每次搵後宮前，都會飲用嘅壯陽秘方究竟係乜？原來係一種以可可豆為主要材料，配以香草、辣椒、蜂蜜等材料製成，被稱為「Xocoatl」嘅冷飲，而當中壯陽嘅關鍵，就係可可豆。
1517年西班牙人埃爾南．科爾特斯拜訪蒙特蘇馬二世時，對方向佢推介「Xocoatl」，更自稱每日飲50杯，每次同後宮曳曳前都一定要飲，仲話有壯陽功效，到1528年科爾特斯就將可可豆及製作「Xocoatl」嘅工具帶回西班牙。後來歐洲人喺當中加入糖，並將辣椒改成肉桂等香料，成為當時嘅奢侈飲品。有趣嘅係1706年時，呢種經改良嘅朱古力飲品經傳教士傳到中國，只係當時康熙皇帝覺得佢僅能助胃消食而冇興趣，結果要到多年後，先至喺中國流行起嚟。
可可豆含有精胺酸、色胺酸、羥色氨酸等成分，其中精胺酸據稱可提升血流量，有助男士兵器進入作戰狀態。羥色氨酸則可令人產生快樂感覺嘅激素，不但令人感到心情愉悅，更起到減壓嘅作用，心情放鬆，自然會更有動力同伴侶進行親密行為。
可可豆內含嘅苯乙胺有「愛情激素」之稱，可以令人產生戀愛嘅感覺。此外，可可豆內嘅可可鹼則有令人興奮嘅作用，同時兩者均可以刺激多巴胺分泌，佢係種令人產生性慾嘅分泌神經傳導物質，故此蒙特蘇馬二世稱可可豆可以喚起性慾，絕對係有根據。