正所謂「人不可貌相」，原來呢種喺內地常見嘅仙茅，居然對補腎壯陽相當有效！學名叫「Curculigo Orchioides」，又叫地棕、獨茅、山黨蔘等，喺長江以南嘅地方均有生長，以四川為主要出產地，而入藥嘅則係佢嘅根莖。話說回來，佢對男士雄風有乜嘢作用呢？
據清代張秉成所撰嘅《本草便讀》稱：「補命門，助陽道，其力頗雄。」認為仙茅能治療腎虛、陽痿及精冷。此外，又能強健筋骨，祛寒濕及暖腰膝。仲有，據張山雷喺1920年出版嘅《本草正義》指：「仙茅與巴戟天、仙靈脾相類，而猛烈又過之。」適用於因肝腎不足嘅筋骨痿軟、腰膝冷痛、因脾腎陽虛嘅冷瀉等。
曾有實驗將16隻體重60至90克嘅成年雄鼠，先取走睾丸，手術後第七日分為兩組，一組餵以70%嘅仙茅浸劑，另一組餵以10克生理鹽水，每日一次並連續餵養21日後，取出佢哋嘅精囊腺量重，發現仙茅浸劑一組嘅腺重大於鹽水組，證明對刺激雄激素有作用。
最常服用方法，就係用嚟泡茶，或配合枸杞、韭菜籽等泡酒，一個月後即可飲用。不過喺內地農村則會將仙茅配合韭菜籽、當歸及白芍加入水中煲熱，然後用嚟泡腳，據稱有上佳嘅補腎壯陽作用。