之前講過飲咖啡嗰陣加啲肉桂粉，可以提升香氣之餘，對男人亦好有益處，事關肉桂有升火助陽嘅作用。其實喺咖啡添加丁香粉，同樣咁香，仲有溫腎助陽嘅功效添！
丁香為桃金娘科常綠喬木植物，產地包括坦桑尼亞、馬來西亞、印尼等，中國海南省都有培植。至於呢種香料有咩咁好，大概可以分為3方面：
喺中醫角度，丁香味辛，性溫，歸脾、胃、腎經，有溫中降逆、散寒止痛等功效，而且據《本草正》記載，丁香可以「壯陽道，抑陰邪」，有溫腎助陽起痿功效，同淫羊藿、巴戟天、杜仲等藥材一齊用，有助治療腎虛陽痿、腰膝痠痛等症。
丁香辛溫氣香，溫中健胃作用顯著，係治胃寒嘔逆嘅重要藥材，亦可緩解腹部氣脹，增強消化能力，同埋減輕惡心嘔吐。
丁香被視為一種強效嘅止痛劑與殺菌劑，能夠紓解牙痛，所以唔少潔齒用品都會加入丁香成分。
喺外國，丁香呢種略帶甜味嘅香料，被認為可以增加血流量、體溫同埋能量，又可以提升睾丸激素水平，而且佢嘅氣味能緩解壓力同焦慮感，對喚起性趣、催情及增強床上表現都有一定作用，有研究更顯示，服用咗丁香嘅50%乙醇提取物，可以令正常雄性大鼠性活動顯著增加，包括射精後不適應期縮短、交配頻率增加等等。