有人話模特兒只係人肉布景板，個人形象唔需要太突出，但呢句說話好值得商榷，好似韓國人氣模特兒李多喜，身上充滿陽光氣息，而且畀到人一種活力十足嘅感覺，因而備受外界注意，成功上位！
出生於韓國首爾嘅多喜，原來有個志願，就係成為一位旅遊作家，但為咗賺取外快，開始做攝影模特兒。由於佢嘅個性外向又貪玩，拍攝期間一有悶場，就會忍唔住整蠱作怪，勢估唔到拍出嚟嘅相片得到大家嘅欣賞，自此慢慢建立起陽光又熱情嘅形象。後來，阿妹仲憑住呢種強烈嘅個性，喺第4屆韓國賽車模特兒大賽中贏得最具攝影潛能獎呢！