搞直播扮Miss 女優好有娛樂性

你肯露時,人哋露得仲狼,家陣要做個出位嘅AV女優,真係唔容易,所以有時真係要有番啲學識同創意,先至可以突圍而出。好似被稱為「人類最強Body」嘅沖田杏梨,為咗搵銀就走去搞遊戲直播,效果仲好有娛樂性。另一邊廂,有性經驗豐富嘅女優喺影片中化身導師,教授各種性愛技巧,希望觀眾可以投入魚水之歡,真係用心良苦!

最強Body搞直播

以前AV女優引退之後,唔係結婚收山,就係轉做風俗孃,但其實只要有諗頭,又豈止兩條出路?好似喺2016年4月引退、有「人類最強Body」之稱嘅沖田杏梨,上個月底開始喺網絡平台Twitch開設頻道「anriokita_real」兼做打機直播,主力打PS4遊戲《魔物獵人》,而首日直播就已經吸引超過19,000名網民睇,認真誇張!

其實呢位擁有一對41L爆乳嘅前AV女優,引退之後有唔少搞作,包括為報紙寫專欄、搞藝術展、拍攝人體彩繪寫真集、上電視台節目等,又喺2018年4月開設Instagram,仲喺2019年10月開設名為「Atelier Anri 沖田杏梨CH」嘅YouTube頻道,真係好鬼死勤力!另外,自從有人彈佢身材發福後,佢喺3個月前開始接受「肉體改造」嘅挑戰,務求回復最Fit身材,更加將鍛煉片段放上網,有興趣可以去睇吓。

睇AV學性教育

雖然唔少男士都係從日本AV獲得性啟蒙,但一般性學專家都話AV入面充斥失實內容,唔能夠盡信,但凡事都有例外,皆因有套AV聲稱搵嚟專家做指導,仲會由AV女優作現身說法兼現場示範添!作品名為《如果你對性生活不滿意,並希望極大程度地吸引女性,及對於那些追求更高級別性生活的人,我們將從女人角度出發,教你如何讓女性體驗真正舒適的性愛!!》,由AV片廠Hunter推出,片名勁長,但觀眾可以顧名思義、對號入座。影片仲搵嚟34E女優通野未帆同33E女優岬梓擔任講師,佢哋會喺片中講解男士吹口琴技巧、指入要點、點樣令女性潮吹、基本衞生、做愛時心態、各種體位等性愛話題,而且內容有專家認證,絕非亂噏。話時話,套片咁有教育意義,可唔可以光明正大咁睇呢?

幾多次高潮至啱?

身為一位暖男,喺啪啪啪時,除咗追求發射嘅快感,亦不能夠忽略女伴嘅需要,之但係女人要有幾多次性高潮先會滿足呢?早前日本官能小說家大泉里香喺Twitter搞咗個調查,睇吓女性覺得每次啪啪啪要有幾多次高潮至合適,結果有179名日本女網民參與,當中有34%嘅受訪女士覺得1次已經夠,22%認為應該有2至5次,14%表示要有5次以上;與此同時,有30%嘅女性表示,就算冇性高潮都冇問題。2至5次性高潮好似好難實現,5次以上仲誇張,點做呀?巴打咪咁心急,原來受訪女士稱,性高潮唔一定喺活塞運動時發生,透過手同口部動作所獲得嘅高潮,同樣收貨。不過,點解有唔少女士覺得冇高潮都冇所謂呢?有女士話,男人失準、自己冇狀態等都會導致呢個情況,反而氣氛至係重點。

撰文:魂