正所謂「異性相吸，同性相拒」，如果有個同性眼睥睥望住你，你唔係覺得對方有問題，就會懷疑佢想挑釁你，但如果係異性嘅話，必然會覺得對方係咪對自己有意思，難怪呢位女網民會有咁嘅疑惑，佢話：「公司有個和我同期入職嘅男同事，由於大家都係新人，所以我哋好快就熟落。我本身有做開HIIT（高強度間歇訓練）嘅習慣，佢聽到就話想學，一個月前開始，每逢星期四晚佢就會上我屋企練習。起初我都冇為意，後嚟發現每次我做示範時，佢都會望住我個胸同Pat Pat，但一接觸到我嘅目光，佢就即刻轉移視線，我咪扮冇嘢囉。但有次我發現佢竟然有生理反應，其實我唔介意佢𥄫我，但我想知佢係咪對我有意思？仲有，我每次都會着緊身褲唔打底同運動胸圍，係咪太性感呢？」
Kandice：姊妹啊，你着緊身褲唔打底，已經好易現形，仲要做埋HIIT動作，講真邊有男人會唔𥄫吖？所以我覺得佢未必係冧你，只係正常反應啫！
PM開工：先利申小弟並唔係鹹濕，之但係個男同事又上你屋企，而你又着緊身褲兼冇着底褲，喺現晒形嘅情況下，如果咁都唔𥄫嘅話，我真心懷佢係偽君子，或者性取向有問題囉！
雲雲：睇你嘅措詞同舉動，其實係咪你對人哋有意思呀？否則你明知佢𥄫你，又點會唔介意呢？問心嗰句，你鍾意人哋就直接講，咪搞咁多嘢啦！
Sunny：你咪喺度FF啦！睇你講嘅嘢，就百分之百肯定你已經對人哋起晒痰！其實女追男好簡單，只要你唔係太醜就得，更何況你做開HIIT，身材都應該幾Fit，要追就追，咪咁多口水！