呢排同另一半講得最多嘅話題係乜？呢位女網友就係因為男友最常講嘅話題而煩惱，究竟男友講啲乜而搞到佢咁嬲嬲豬呢？佢話：「男友因為工作關係，最近經常要幫公司採購口罩，日日上網睇吓邊度有口罩賣，又晨咁早去排隊。見男友咁辛苦，我咪喺床上好好招呼佢，又關心吓佢聽日去邊度買口罩，又搵吓資料同佢講邊隻口罩好用同可靠。但就係咁，我哋嘅話題總離唔開口罩，起初我都覺得OK，但佢開口埋口都係口罩，食飯又講，沖涼又講，連搞完嘢之後都講，真係佢唔厭我都煩啦！有晚我問佢，除咗口罩之外，仲有冇其他嘢講？點知佢嬲咗，其實我仲嬲，我哋係咪得番口罩呢個話題呢？咁上床使唔使戴口罩呀！我就嚟煩死喇！」
網友回應
Candice： 你真係要體諒吓佢，其實呢段時間個個都有壓力，加上你話佢要幫公司買口罩，冇嘅話佢實孭鑊，壓力真係好大o架！
Sami Lee： 我覺得你講出嚟係冇錯，但方式要變吓囉，因為佢真心覺得煩惱先至同你講，但你又一嘢封佢把口，唔嬲就奇啦！你試吓同佢計劃一下，放假去邊度郊遊放鬆吓，應該可以轉換一下心情嘅。
日日買： 睇得出你壓力都好大，但話晒係兩個人相處嘅問題，除咗口罩，亦可以因為其他話題而出現爭拗，咁就應該轉移一下視線，而唔應該針對呢個話題而嘈，免傷感情。
嬲嬲豬： 我覺得你係嬲，但佢亦煩，呢個時候最好就係煮餐飯畀佢食，男人好易氹，見到你其實了解佢，而你又支持佢，煩惱好快就冇晒啦！