作為外國人，每次去日本嘅情趣酒店「Love Hotel」（ラブホテル）都有眼界大開嘅感覺。之但係大家又知唔知，就連日本人本身亦不時對呢類酒店嘅種種摸不着頭腦？早前就有日本網民將佢哋喺情趣酒店嘅奇趣遭遇大分享，睇吓你又會唔會有同感！
日本專為啪啪啪而設嘅情趣酒店，佢哋除咗有超短兩小時嘅時租服務外，更設有提升情趣嘅主題房同情趣道具，對慾火男女嚟講十分貼心。早前有日本網民喺Twitter上掀起名為「＃愛情酒店甚麼都有」（#ラブホあるある）嘅話題，分享自己遇上嘅古怪、騎呢或尷尬經驗。好似有去大阪旅行嘅網民稱，以為某座建築係大阪城，點知原來係間Love Hotel！另有唔少網民一直懷疑，情趣酒店床頭嘅控制台究竟有冇人識得用？有網民則稱同女友翻開房內嘅情趣Cosplay服目錄已相當過癮，亦有唔少網民稱讚Love Hotel停車場內自動遮蔽車牌號碼服務相當貼心。不過講到最爆笑嘅體驗，竟然係有好多網民使用房內泡泡浴粉時，因投放過量搞到成個浴室都係泡！
日本十八禁漫畫同勵志竟然有關係？日本十八禁漫畫家WA（わ）早前喺網上發表一篇畫畫經歷嘅文章，當中勵志內容引嚟日本網民極大回響。佢喺文中指最近被問及畫漫畫同年齡嘅關係而勁感觸，話說現時日本漫畫界嘅畫家，好多都係十幾歲便已經喺同人界出道，而佢則係37歲至開始認真畫漫畫，到40歲才成立漫畫同人團體WASANBON（わさんぼん），推出首本十八禁同人誌《WASANBON vol.1》，至今已推出到第15期。佢表示：「雖然愈早開始畫漫畫當然係好，但如果因為年齡或面子，而放棄想做嘅事，未免太過可惜。」有31歲嘅網民睇完佢篇文章後，感激WA畀咗佢動力向前邁進，更有52歲嘅主婦表示會繼續追尋漫畫夢。一下子喚醒大家齊齊畫鹹濕漫畫嘅衝動，呢種勵志係咪有啲怪呢？
自從電影《格雷的五十道色戒》喺全球掀起風潮後，戀物癖正式從地下走上地面，而美國性健康專家Evan Goldstein博士所領導嘅團隊，更以美國網絡上同戀物有關嘅熱搜詞、話題同熱賣戀物類情趣用品等大數據，製作出美國首個包羅五十個州嘅戀物癖地圖，而數據發現紐約州最愛皮革、華盛頓州係封口、加州係滴蠟、伊利諾伊州則係角色扮演等，當中又發現牛仔競技發源地嘅德薩斯州，最愛戀物類型係鞭打。為咗方便統計，佢又將美國分成東北、南、西同中西部四個地區進行分析，結果發現中西部最愛集體性愛同體育器材，南部最愛制服同被虐、西部則獨愛被虐，而東北部卻係氣球、愉虐、戀足、滴蠟、皮革等樣樣啱玩。Evan Goldstein博士稱從呢點可以睇出，美國東北部地區嘅人對戀物嘅接受度最為多元化。
撰文：魂