為乜要問Ex掂唔掂？

雖然好姊妹之間應該係無所不談，但對某啲人嚟講，唔係個個話題都講得，好似呢位女網友咁就因為姊姊嘅一個問題而嬲到爆，佢話：「因為同拍拖十年嘅男友分手，於是約成班識咗多年嘅姊妹嚟我屋企打邊爐，期間有個姊妹問我前男友嘅床上表現係點，當時我聽到就扯晒火，因為佢亦係我前男友嘅朋友嚟，所以我覺得不論從乜嘢角度嚟講，佢呢刻都唔應該咁問我。佢見我避而不答，冇耐之後又問番我同一個問題，仲話佢以前喺遊船河時，見過我前男友好似幾雄壯，嗰刻我實在忍無可忍，即時黑面，而佢亦冇再追問。我真係唔明佢係乜嘢心態，如果大家係呢位姊妹會唔會問呢個問題呢？」

網友回應

Thera：梗係唔會問啦！識唔識得你前度男友都好，都冇理由會喺呢個時候問，究竟佢知嚟做乜？同埋知道咗又有乜用呢？

祖瑟芬：其實你又唔使諗得咁嚴重嘅，可能佢只係想打開個話題啫，佢唔知道原來你好介意，結果咪發生誤會。作為咁多年嘅姊姊，佢嘅性格係點你應該最清楚。

Cin明：識咗咁多年，佢冇理由唔知喺呢個係非常時期，問呢啲咁私人嘅問題會令你唔開心囉。我覺得佢應該係純粹八卦，八吓你哋嘅私生活係點，然後唱衰你個前度。

柔柔：我唔知成晚個氣氛係點，同埋佢係咪誤會咗你已釋懷，先至會問啲咁嘅嘢。不過你作為當事人，而呢個係識咗咁多年嘅姊妹，應該直接話佢知你唔鍾意講呢個話題。