完事後被趕走

有位女網民投訴，喺男友家夜半銷魂之後，卻被對方趕返屋企，因而令佢好氣憤，佢話：「放工後幾乎每晚都會上男友屋企煮飯仔，食完飯後就會一齊睇電視，跟住就會啪啪啪。其實我哋拍咗拖3年，而上佢屋企只係呢兩三個月嘅事，原因係佢最近買咗樓，而以前我哋就會去爆房曳曳。但問題就出現嘞，完事後，佢就會問我幾時返屋企，你知啦，做完後好攰o架嘛，好想瞓覺，但佢硬係要趕我走，試過已經係凌晨兩點幾，佢情願Call 的士送我返去都唔畀我過夜。我問過佢係咪有第二個女人，佢話因為習慣一個人瞓喎！雖然我都會體諒佢，但佢明唔明做完後要人哋走嘅感覺係好差囉！」

網友回應：

Keran：習慣一個人瞓好正常喎，好似我父母咁，早喺我出世前佢哋已經分床瞓，而我爸爸嘅理由就同你男友一樣，所以真係唔出奇。

丸子：問題係你男友唔畀你過夜，定係唔想同你瞓一張床咋？如果前者嘅話，你可以試吓問佢可唔可以瞓梳化，而後者嘅話就惟有睇吓可唔可以擺多張床。

斜行種：咪玩啦！香港地有幾多個人屋企個睡房可以擺到兩張床呀？分開瞓嘅話，不如一個瞓房，一個瞓廳好過啦！你男友有冇蠱惑就唔知，但懷疑佢冇心同你一齊住亦相當合理。

紅豆：我好明白你嘅感受，就好似應召女郎咁，仲要煮埋飯佢食，感覺勁唔掂囉。一係咁，以後你唔好同佢喺屋企做，做嘅話就要過夜，睇吓佢有乜嘢反應。