情侶們最怕另一半同前度藕斷絲連，好似呢位男網民同女友拍拖四個月，並且喺一個月前同居，但係男方幾乎每晚都會收到前度嘅電話，佢解釋因為前度一個人喺美國生活，冇朋友亦冇親戚，感到相當寂寞，因此起初會同對方傾電話，點知前度知道佢有新女友後，就晚晚打嚟，佢話：「以前未同居時就話冇所謂，家陣就覺得好煩擾，一來怕女友知道，二來前度經常Send啲性感自拍照嚟，驚女友睇到嬲爆呀！最衰我見到啲相又起反應，我自問係唔啱嘅，但我覺得呢啲係人之常情，究竟點樣先至可以唔再被前度騷擾呢？」
你都知道自己衰呀！邊個叫你咁心軟呀？你拍咗咁耐拖都唔知前度係乜嘢性格，佢擺明想搞散你哋啦！換過個電話咪一乾二淨囉。
如果無啦啦換電話，女友一定會懷疑，最好嘅方法梗係直接同前度講，話啲相令我好作嘔，再唔係Send埋畀佢父母睇，等佢知難而退。
你真心覺得對方係騷擾？定係你好享受一腳踏兩船嘅感覺呀？我唔知你同前度點解分手，只係知道你對前度仲有感覺，結果只會造成三輸局面。
你真係有心解決呢個問題嘅話，其實可以直接咁同前度講，叫佢死咗條心。不過睇你嘅態度又唔似會咁做，你都係諗清諗楚先至好同人同居啦！
撰文：魂