有女友或老婆嘅男士，有冇留意佢哋身邊嘅閨密呢？好似呢位男網民咁，因為女友嘅一班豪放閨密搞到個心十五十六。佢話：「唔知係咪佢哋以前讀女校關係，表現相當豪放，唔理着迷你裙定熱褲，坐低總會擘大雙腿，如果着低胸衫仲大鑊，一啲都唔介意畀你睇！我唔知點同女友講叫佢班閨密收斂一下，你哋話我點算好呀？我真係驚有日會把持唔住呀！」
抽濕枱燈：你咪立壞心腸啦！你之所以驚把持唔住，係因為你淫心未泯，色心又起啫！你根本就係想食人哋好耐，否則你點會留意到其他人係咪有樣又有身材呢？
清清鬍邊鬚：我唔覺得有乜唔好意思喎，望咪望，𥄫咪𥄫，有幻想咪有幻想囉。我哋係正常男人嚟o架，見到索女，梗係會起色心啦！你又唔使咁責怪自己。
大灰郎：所以話女友有索朋友真係唔係一件好事，好似我咁，女友班閨密個個都係奇珍異獸咁樣，莫講話佢哋坐姿豪邁，試過同佢哋一齊去遊船河，我真係覺得自己超凡入聖，零心動囉！
LINGINGER：你講，你係咪喺度晒命！我想有咁嘅機會都冇呀，第一，女友嘅閨密唔多，第二，嗰兩三個送都嫌阻碇，第三，我唔嫌佢哋煩已經偷笑喇！
撰文：魂