隊長威住慶生辰

一般人過生日，都係簡簡單單同家人切個生日蛋糕就算，但係身為樂壇人氣組合隊長就唔可以求求其其喇，一定要威！至於點威法？譜久村聖就去到夏威夷拍攝紀念22歲生辰嘅寫真集，夠威未？

譜久村聖喺12歲時成為少女組合Hello! Project Egg嘅成員，之後加入早安少女組，阿妹因為能歌善舞，仲擁有一副氣質迷人嘅正統派面孔，人氣上升得相當快，2014年更從師姐道重沙由美手上接過隊長重任！除咗帶住早安少女組四出登台，譜久村聖亦推出個人寫真集，最新推出嘅《Makana》就係佢出道以來第5本作品，而呢本寫真集亦係紀念譜久村聖22歲生辰之作，為隆重其事，特別花重金去到夏威夷取景拍攝。

村聖妹喺當地不同地方觀光遊覽，當中流露出好多天真、放鬆嘅一面，配合甜美嘅笑顏，散發出強大嘅治愈能量！當然村聖亦會換上泳裝演出，將略帶肉感又雪白嘅胴體表露無遺。另外，村聖亦會少有咁換上運動裝展現活力十足嘅一面，睇嚟阿妹去到夏威夷的確心花怒放！