超萌狐狸內衣香艷動人

性感嘅Cosplay服裝令男士有心跳加速嘅感覺,最近日本一個Cosplay服裝品牌就推出狐狸造型嘅Cosplay內衣,更搵嚟伊織萌做模特兒,夠晒養眼!不過講到令人食指大動,梗係及唔上秋葉原嘅期間限定巨乳女郎拉麵咁吸引啦!

性感火辣口水流

傳說狐狸精會化身成美女勾引壯男,雖然只係傳說,但狐狸同美女卻因此而扯上密不可分嘅關係。齋講嘅話未免太空泛,最近日本一間專門製作Cosplay內衣嘅SugarPet又有新作登場,主題就係狐狸,名為「牛奶糖狐狸」(キャラメルフォックス)。呢套狐狸Cosplay內衣點解會加上「牛奶糖」三個字呢?有網民認為應該係同佢嘅代言人有關,原來SugarPet今次搵嚟人氣巨乳Cosplayer伊織萌做模特兒,佢唔單止胸前偉大,樣貌萌味十足,經常以性感Cosplay造型示人,莫講話平時已經令人流晒口水,今次換上狐狸內衣後,萌味同火辣度更係令人血壓爆升呀!

講番呢套狐狸內衣,除咗有胸圍同底褲外,仲有狐狸耳頭箍、毛毛頸環、一對手環同一條狐狸尾巴,可謂配件齊備。據廠商表示,任何人換上呢套內衣就會即刻變成萌味十足嘅「狐狸精」。事實上,呢間廠喺去年推出處女作內衣系列時,已搵伊織萌示範穿上內衣,結果反應相當好,因此今次再接再厲,絕對係明智之選!不過話時話,究竟女士們會唔會穿着呢套「牛奶糖狐狸」內衣呢?

巨乳女神賣拉麵

巨乳女郎本嚟同日本拉麵大纜都扯唔埋,但若然將兩者加埋一齊就會引起極大回響!話說早前日本秋葉原出現一間名為「乳野郎拉麵」店,從店名已經透露出呢間拉麵店嘅特色,就係店內嘅拉麵師傅同服務員都係清一色巨乳女郎,佢哋仲會穿着爆乳制服,實行以乳溝嚟招呼食客。咁都未算吸引,其中一位爆乳拉麵師傅仲係超人氣35H爆乳寫真女優清水藍里呀!莫非阿妹唔拍寫真,走咗去開拉麵店?原來呢間拉麵店原名叫做「野郎拉麵」,之所以加個「乳」字喺前面,皆因佢同任天堂遊戲機Switch最新遊戲《PEACH BALL 閃亂神樂》合作搞宣傳,進行3日限定活動。清水藍里作為呢個出名以爆乳為賣點嘅遊戲代言人,當然要挺胸兼晒乳溝嚟進行推廣。喺活動期間,拉麵店亦推出限定特色拉麵「爆乳湯拉麵」,雖然不外乎豬肉、溫泉蛋、芽菜等配料,但冠以爆乳之名點都可以呃吓Like。其實《閃亂神樂》系列以往嘅宣傳活動,早就試過玩限定麵食呢招,喺2015年7月佢同「野郎拉麵」合作推出2日限定爆乳中華冷麵,而冷麵嘅賣相更係啜核,兩個各自被點上一點嘅溫泉蛋,外形就好似一對爆乳咁,夠晒出位!

日女追男愛跟蹤

不論男女當遇上心儀對象時,總係唔敢向對方表白,喺咁嘅情況可以點做呢?寫情信?好似好浪漫,但係一拎起支筆就唔知寫乜好,即使寫好封信,最後亦唔敢寄畀對方。日本戀愛網站「愛Cutlet」(愛カツ)最近做咗個調查,向一眾女網友詢問「當遇到鍾意嘅人時會做出乜嘢嘅行為」,然後畀出多個唔同嘅選項,總共有739名女性參與,結果發現當中有146人揀「查閱對方嘅社交帳號」、106人揀「提前埋伏然後扮偶遇」、103人揀「喺對方屋企門口徘徊」、102人揀「乜嘢都唔做」、94人揀「連佢嘅朋友及前度嘅社交帳號都查閱」、52人揀「尾隨對方」、50人揀「去佢工作嘅場所」,另外仲有及86人揀咗「做過比以上更過分嘅事,但係唔可以講出嚟」。嗱,大家留心睇嘅話,會發現當中嘅選項其實幾特別,事關唔少都同跟蹤或類似跟蹤有關嘅行為,尤其係尾隨對方及喺對方屋企門口徘徊呢兩項,雖然暗戀往往令人迷惘,但被人跟蹤或見到有人喺屋企門口行嚟行去,總會令人覺得煩惱同不安,因此若然真係鍾意人哋,都係的起心肝向對方表白,情願畀人狠狠拒絕食檸檬,都唔好令他人覺得煩擾。

撰文:魂