男人成日叫女友或老婆唔好亂諗嘢，其實男人咪又經常亂諗嘢，有時仲諗埋晒啲衰嘢添！不過呢單嘢究竟係咪男網友諗多咗呢？有位男網民表示有個好玩得埋嘅女性朋友，尤其係兩人都鍾意打機，因為女方同屋企人住關係，所以經常上佢屋企打機，為咗方便，仲畀咗條鎖匙對方。最近女方搬咗出嚟住，於是叫佢上去屋企打機，點知一入屋就覺得奇怪，佢話：「入到屋，就見到啲底褲同胸圍掛晒出嚟，我咪扮睇唔到囉！不過有時對眼又不期然咁望咗幾眼，畀佢捉到正，仲問我啲底褲係咪好多花款，我話係，有喱士又有T-back，跟住佢笑吟吟咁向我介紹邊條底褲佢最鍾意、邊條成日着。我問佢點解唔掛番入房，佢就話啱啱洗完要晾乾，跟住我就若無其事同佢打機。事後諗番，佢其實係咪色誘緊我？」
Love Love：呢啲嘢真係好難講，我對住班男仔Friend都係咁，因為我哋太熟喇，識咗十幾年，佢哋上嚟我屋企嘅時候，我都唔會收埋啲底衫褲，不過就唔會好似你個朋友咁逐條底褲介紹囉！
那年那日去旅行：你想多咗啦！佢只係當你好姊妹才咁做吧。呢啲叫做開心Share，咪同你分享一下佢啲底褲有咩款式同最鍾意邊條囉！所以佢根本唔係色誘你，你不用太在意。
三日唔埋：擺明係有嘢啦！你話冇嘢我一定唔信囉，不過唔係佢對你有嘢，而係你肯定對佢有嘢，否則點會畀埋條鎖匙人哋，隨時上你屋企，仲唔係暗示對方係你女友？
高富稅：傻豬嚟嘅，底褲同胸圍之嘛，有幾咁奇怪呢？我啲女性朋友都係咁樣，又唔見佢哋食咗我？你咪咁心多啦，隨時冇咗個老友（口架）！
撰文：魂