情慾小說同成人影片嘅最大分別，在於前者唔可以單靠一味鹹濕，仲要有出色嘅故事同情節先至令人有追看性，而講到能夠將情慾同情節兼顧嘅小說，由美國情慾小說家茱麗‧詹姆斯著作嘅《婚頭妙冤家》就係其中之一。放棄律師工作轉投情慾小說界嘅茱麗，曾被評為2008年5位最佳新進作家之一，而佢嘅作品曾多次榮登暢銷書排行榜。《婚頭妙冤家》嘅故事講述女主角席欣妮雖然事業有成，但卻遇人不淑，喺婚禮前夕先至發覺未婚夫原來長期有外遇，令佢自此以後對情場浪子敬而遠之，同時希望搵到一段長久又穩定嘅感情。有次佢喺細妹嘅婚禮中擔任伴娘，因而結識到擔任伴郎嘅花花公子羅范恩。對花花公子一啲都唔感興趣嘅佢，雖然對方魅力過人，但佢卻拒絕投降，並不斷提醒自己花心嘅男人靠唔住。喺情場上食女無數嘅羅范恩，面對席欣妮呢種拒人於千里之外嘅女性，令佢感到極大興趣卻又無從入手，令兩人變成歡喜冤家。不知不覺，羅范恩真心愛上席欣妮，縱然有種希望同對方同諧白首嘅衝動，卻又唔夠膽作出承諾，究竟呢對冤家最終能否開花結果呢？