每逢有大型活動，Pornhub都乘勢抽水，今屆足球盛事都唔例外，早前公布喺賽事期間鹹網瀏覽量嘅數據，結果發現喺決賽當日，法國對克羅地亞開波前，喺法國瀏覽量下降咗24％，而克羅地亞更大跌46％。隨住比賽法國隊愈踢愈強，當地瀏覽量繼續有秩序下跌，相反克羅地亞就穩步上揚，有人猜測係因為克羅地亞人民深知球隊爭勝無望，選擇放棄睇波，轉睇鹹網尋開心好過喎！而比賽結束後，法國嘅瀏覽量依然低於平時水平，克羅地亞則「迅速恢復」，啱嘅，球迷應該學今屆球員咁有打不死精神，要積極做人，就應該借助啲刺激嘢振奮自己嘅！當然統計唔止一場啦，值得留意嘅係，Pornhub發現每當球隊進入加時賽嗰陣，瀏覽量都會下降，就以克羅地亞對英格蘭嗰場計，前者暴跌70%，相信係球迷要全神關注最後情況，但問題係，點解外國球迷總係可以一心兩用嘅？睇足球比賽同時又睇波，莫非佢哋習慣睇波就要上鹹網嘅？