創意可以喺邊度搵？從今次介紹專為巨乳女士而設嘅浮床，就會發現其實可以源於一個玩笑。不過有啲嘢就唔可以亂開玩笑，好似英國有網站調查發現，有3成男女對初次性體驗感到唔滿意，當中以女性為最多，究竟係乜嘢原因令佢哋不滿呢？
女士們影相唔單止想個樣影得靚，仲想對腳影得修長一啲，咁就要識得擺出「芭比腳」喇。英文叫做「Barbie Feet」，近排喺外國嘅Instagram相當流行，特點在於女士們影相時，其中一隻腳或雙腳都好似着咗隱形高踭鞋咁趷高，從而睇起嚟對腳會變得長啲，若然配合埋鏡頭嘅弧度及拍攝嘅角度，便能打造出一雙修長美腿嘅效果。佢之所以會同著名嘅芭比娃娃扯上關係，如果大家細心留意嘅話，會發現芭比娃娃對腳嘅設計，為咗方便玩家換上各款高踭鞋，於是設計成趷高雙腳，因此大家就將呢種趷高腳嘅動作稱為「芭比腳」。
話說回來，其實呢個動作亦非女士嘅專利，男士同樣可以咁做令對腳睇落更修長。劍橋大學喺今年初就進行咗個關於男士腿長同吸引力嘅網上調查，結果發現男士雙腿略長嘅話會更受女士歡迎。乜嘢叫做略長呢？舉個例子，身高1.8米嘅男士腿長91cm嘅話就最為吸引，只係長過呢個長度嘅話，吸引力反而會減少。男士們以後影相時，不妨試吓趷高雙腳喇！
夏天去沙灘游水，其中一個良伴非浮床莫屬，可以喺海上浮吓浮吓，相當寫意。之但係大家有冇留意對巨乳女郎嚟講，當佢哋趴喺浮床時，一對巨乳被擠壓會感到唔舒服呢？因此有內衣品牌就為巨乳女郎打造一個專門為佢哋而設嘅獨特浮床。呢個由英國內衣品牌Bravissimo設計嘅巨乳女郎專用浮床名叫「LILO」，原本呢個浮床構思只係今年愚人節同大家開嘅玩笑，諗住呃大家佢哋將會推出呢個浮床讓巨乳女郎趴得更舒服，卻估唔到大獲好評，而當大家得悉只係玩笑後，便要求佢哋認真考慮推出市面，Bravissimo亦覺得可行，於是經過認真設計同修改後，不但將浮床推上生產線，並命名為「LILO」，早前於官網上公開發售。
呢個浮床最大嘅特點係設有一個特大嘅凹槽，當胸前偉大嘅女士趴喺度時，雙峰便能夠舒舒服服咁安置喺凹槽中，令咪咪唔會被擠壓而感到不適。售價為25英鎊（約259港元），現時只得粉紅色供選擇。不過有網民話呢張浮床其實男女合用，皆因凹槽亦可以用嚟放置飲品同食物，唔使擔心會跌咗落水，亦有網民稱喺凹槽上放上冰塊，用嚟冰鎮心口同飲品就更加好。
唔知大家仲記唔記得第一次係幾時發生呢？對於男女嚟講呢個咁特別又有特殊意義嘅初體驗，縱然事隔多年仍然會記憶猶新，不過問到滿意度嘅話，原來感到唔滿意嘅人數卻有唔少。英國社會媒體網站早前進行咗個關於初次性體驗滿意度嘅調查，佢哋成功訪問咗嚟自美國及歐洲嘅1,000名男女，結果發現有百分之三十一嘅受訪者唔滿意初體驗，當中以女生佔嘅比例最大。問到佢哋乜嘢原因而感到不滿，有過半數嘅受訪者表示係因為同自己唔鍾意嘅人發生關係，當中亦包括埋一夜情，有受訪者表示由於當時感到好奇，加上一時衝動，同一個自己唔鍾意嘅人發生關係，事後感到相當後悔。至於另一個令人覺得唔滿意嘅原因，係因為覺得對方唔夠貼心，令初體驗感覺唔好，有受訪者表示由於係第一次關係，佢哋只係識得單純滿足性衝動，而漠視咗另一半嘅感受，因此令唔少女受訪者留下不愉快嘅回憶，有人甚至喺對方匆匆完事後，先至發現自己嘅第一次咁就冇咗。對男士嚟講覺得唔滿意嘅原因，有百分之二十五嘅受訪者表示，因為自己嘅第一次係喺飲醉酒後發生，令初體驗變成斷片式記憶，甚至有人表示成個過程斷晒片，事後覺得咁樣好唔抵。其實第一次咁重要，就應該要認真地進行啦！
撰文：魂