美國嘅情色小說之所以咁吸引，除咗因為鹽花劇情睇到人血脈沸騰外，多元化嘅題材更係引人入「性」。如果對神偷、懸疑加情慾故事有興趣嘅話，呢本由蘇珊妮‧安諾所著嘅《妙手偷心》，絕對可以滿足到你嘅要求。蘇珊妮擅長鋪排伏線，喺適當時候加入情慾內容，令人睇得更加扣人心弦。故事講述女主角曼莎係一位性感迷人嘅女神偷，今次佢嘅目標係居於英國億萬富豪理查嘅棕櫚灘別墅內價值連城嘅古董，本來呢次行動萬無一失，點知一切竟出乎意料。當佢潛入屋後，發現原先聽日先到埗嘅理查，竟然提早一日嚟到別墅，因此當場斷正，被警衞扣留。正當佢諗住點甩身之際，理查發現古董已不翼而飛，呢個時候別墅內暗藏嘅炸彈突然爆炸，喺千鈞一發之間，曼莎飛身將理查撲倒而逃過一劫，而佢亦趁混亂帶走理查。警方到場後發現曼莎同理查已唔見蹤影，認為曼莎係事件中嘅主謀。另一邊，曼莎要求理查還佢清白，而佢會幫理查搵出古董嘅下落，期間兩人關係愈嚟愈密切，更發生肉體關係，至於係邊個偷咗個古董呢？就留待大家買本書睇喇！