當男女愛得火熱時，係咪會失去常性，而面對愛情同性愛兩得意之際，若然發現原來有件事，會令所愛嘅人陷入萬劫不復之地時，感情同良知之間究竟又如何抉擇呢？呢類題材嘅小說雖然有唔少，但好似美國情慾小說家Lisa Kleypas嘅作品《春天的醜聞》咁，不但能夠將呢種兩難化成優美文字表達出嚟，同時又可以喺愛情同情慾兩種元素兼顧嘅情況下，睇到讀者血脈沸騰，難怪獲得極佳嘅評價，而Lisa Kleypas更獲封美國情慾小說天后。
故事講述豪門柏曼家嘅家主有4位千嬌百媚嘅女兒，當中只有黛西未出嫁，因此家主表示如果佢唔能夠喺限期之內嫁出，就要嫁畀佢睇中嘅男人，而對方偏偏就係同黛西有仇嘅墨修‧施威特。喺黛西眼中對方係個鐵石心腸，同時待人非常冷漠嘅男人。不過命運就係如此作弄人，經過一段時間跟墨修相處後，黛西發現對方原來係個相當迷人嘅男人，因此兩人嘅愛火同慾火一發不可收拾。正當黛西以為終於搵到一位夢寐以求嘅男人之際，卻發現對方有一段埋藏已久嘅醜聞，若然將呢段醜聞揭發出嚟嘅話，會危害墨修嘅前途，面對如此困難嘅選擇，黛西實在唔知應該點做。
書名：《春天的醜聞》
售價：約HK$75
撰文：魂