夏灣拿:多情人客

撈女養姑爺仔,平常事,姑爺食慣軟飯,全部衣食住零用,都由女方照起。有個撈女美琪,養一個仔名叫菲列,三茶兩飯兼賭大隻細隻,自然唔掂,但近來撈女亦唔掂,度水自然冇咁順手。

一晚,菲列曰:「你死都要死三尺水畀我,因為冇我就撲海。」

美琪曰:「你都唔化,三兜就勉強,搞到尺尺聲,唔該你咯。」

菲列曰:「唔好咁對我,近來我唔係幾好老脾。」

美琪曰:「我都冇,點呀?」

菲列質兩拳過去,喝曰:「你再窒我就砌冧你。」

美琪唔出聲,走入廚房,執起把菜刀出來,砍菲列幾刀,斬到佢血淋淋,曰:「我養你,搞到你打我,死衰人,狗都唔會咬主人呀,你連狗都不如。」跟住打九九九,直認斬人。

警方詳問口供之後,以同居男女反目,打架傷人落案,美琪因為未夠十九歲,法官判入教導所,受感化十八個月至兩年。

有個趙姓人客十分歡喜美琪,去到架步不見,捧佢個死黨姊妹小麗,始知美琪斬傷飛仔入咗教導所,曰:「斬得好,不過慘啦,要成年至出得來。」取出百元曰:「小麗,唔該你代我去探吓美琪,買嘢畀佢食,以後我每次來都會捧你場,作為報答。」

小麗曰:「你真係好,第日我入冊你亦搵人探我否?」

老趙曰:「大吉利是,你唔會。」

以後小麗每月都代老趙探美琪一次。

轉眼便過了一年零三個月,美琪以行為良好獲得提前釋放,但係每月仍然要報到一次。

美琪約老趙見面,曰:「多謝你咁關心我,人客之中,冇一個好似你咁長情,易求無價寶,難得有情郎,我想嫁畀你,從此收山,依家我先奉獻肉體畀你。」老趙大喜答應。

美琪自從嫁了畀老趙後,真係洗盡鉛華,循規蹈矩,完全冇一啲撈女的習氣,老趙真係不枉對她多情了!

夏灣拿

一九七六年四月九日