孖辮妹展現純真魅力

清新味道《晴天的雙馬尾》

日本人認為雙馬尾呢種紮頭髮方式，可以展現出少女嘅清純味，而ACG迷更視為萌屬性之一，因此日本寫真攝影師古谷完便推出呢本以美少女味道加雙馬尾為主題嘅寫真集《晴天的雙馬尾》（晴れのちツインテール）。古谷完向來對雙馬尾情有獨鍾，佢認為呢種髮型可以令女性睇起嚟更加吸引，外形更具健康美，以及展現出快樂嘅精神。為咗展現出雙馬尾美女嘅吸引力，喺呢本寫真中，古谷完搵嚟田中里奈、佐野日向子、柚來、三戶夏萌、西萌奈香、浦谷原奈、小出友華、吉田理紗、永井亞子、宮司愛海及吉崎綾合共11位清純系美女，以唔同嘅造型展現雙馬尾嘅魅力。

百位美女《日本雙馬尾百景》

如果覺得11位美女仲未能展現出雙馬尾魅力嘅話，呢本名為《日本雙馬尾百景》（日本ツインテール百景）嘅寫真集，絕對可以讓大家睇餐飽。事關呢本寫真集雲集咗100位由日本雙馬尾協會選出嚟嘅美女，以唔同嘅服裝造型及唔同嘅雙馬尾紮法，展現各種雙馬尾嘅萌系風情。呢百位美女都係人氣模特兒及水着女優，身材各有睇頭，配合清新嘅氣息，係咪好滿足呢？據有份參與製作寫真集嘅攝影師正司慎一郎稱，每位雙馬尾美女嘅髮型都搵嚟專業髮型師設計，並且配合合適嘅服裝，同埋喺100處地方進行拍攝，展現出喺唔同環境及造型下雙馬尾嘅魅力。另一位有份參與嘅攝影師古谷完更誇張地話：「雖然呢個世界有唔少非物質文化遺產，但要我揀嘅話，雙馬尾一定上榜。」

終極萌味《雙馬尾與機關槍》

雙馬尾同機關槍之間究竟有乜嘢關係呢？老實講，真係唔知，只知道喺呢本名為《雙馬尾與機關槍》（ツインテールと機関銃）嘅寫真集中，佢哋搵嚟YURA、永井亞子、阿知波妃皇、新部宏美、松川佑依子等13位美少女，化身成手持各類輕型及重型機關槍嘅清純美少女，將暴力美學展現喺大家眼前。其實呢本寫真推出時，出版商介紹過呢本寫真嘅理念，表示透過雙馬尾呢種日常髮型，同埋機關槍呢種武器，將可愛同暴力富有詩意地結合埋一齊，係一種展現出萌系美嘅終極形式。雖然唔係好明佢講乜，但寫真集推出後卻深得軍事迷喜歡，認為具有奪走佢哋顆心嘅魅力，唔知大家又認唔認同呢？

雙馬尾娘 真希瀨冬月

如果要數喺日本AV界有邊位女優係著名雙馬尾擁躉嘅話，必然係真希瀨冬月。喺1993年11月11日於日本東京出生嘅佢，喺2012年6月憑藝名小林冬月以蘿莉系形象出道，2014年10月則改以現時藝名，繼續AV演出工作。出名鍾意雙馬尾髮型嘅佢，經常喺Twitter上分享自己嘅雙馬尾自拍照，因此被人稱為「雙馬尾娘」。不過喺2016年7月14日，佢表示為咗休養身體而暫別AV界至今。有趣嘅係雖然佢暫別AV界，卻喺風俗界相當活躍，早前佢就喺位於新潟出名多AV女優客串嘅出張風俗店「Rookie」入籍。當然，作為一位薄有名氣嘅AV女優，佢同樣係期間限定啦！

雙馬尾日

日本紀念日協會喺2012年時，將每年2月2日定為「雙馬尾日」（ツインテールの日），至於點解要定喺呢日卻眾說紛紜，有人認為同讀音有關，亦有人認為只係因為呢日易記。有見及此，日本紀念日協會作出解釋，理由竟然係同日本人氣動漫《美少女戰士》有關！原來自呢套作品喺90年代中推出後深受歡迎，尤其係當中嘅孖辮女主角月野兔更成為超人氣角色。為咗推廣孖辮魅力，因此佢哋揀選咗「2」呢個具有Twin意思嘅日子，因為孖辮嘅英文係Twin Tail。由於呢個紀念日同日本嘅ACG文化有相當關係緣故，當天有唔少動漫迷上載雙馬尾少女嘅人像漫畫，分享雙馬尾獨特嘅魅力。

撰文：魂