愛情故事加上情慾橋段，往往扣人心弦，同時又令人有心跳加速嘅感覺，而美國情慾小說作家Julie James嘅《絕配來敲門》，更係令人睇到回味不已。2008年Julie憑住處女作《情逢敵手》一炮成名，並被評為美國最佳5位新進作家之一。喺呢本作品中，佢熟練地將愛情及情慾元素糅合，同時剖白兩位對愛情有介蒂男女嘅情慾糾纏。故事講述從事離婚律師嘅女主角施薇麗，由於看遍世間男女嘅醜態，而對幸福姻緣零期待，寧可將卵子送去冷凍，都唔想對人生失去選擇權。某日有位叫狄福特嘅型男搬到隔籬，由於對方為人霸道，故施薇麗一直唔想同對方有轇轕，卻因為接下對方細妹嘅個案，惟有開始跟對方接觸。狄福特對愛情同樣抗拒，更討厭對幸福有期待嘅女性，而好似施薇麗呢種對愛情勁灰嘅女性，對佢嚟講正係絕配，不過面對女方鐵壁防禦，佢始終唔敢表白，而令到兩人嘅愛情之火，喺火熱同冰冷之間徘徊。