陳翁未撈起前，只係一間公司的職員，月支三百零銀人工，此乃十多年前之事了。
十年後，陳翁已經係一間大公司的老闆，有一件事令陳翁耿耿於懷，因為當年常與幾個同事去一間大舞廳跳舞，但只係跳茶舞而已，晚舞則負擔唔起，不久，他喜歡了一個小姐名叫秋萍，十八、九歲，明艷活潑，十分迷人。
一日，秋萍曰：「我啲姊妹話，好少見你哋晚上來，是否應酬多？」
陳翁面紅，曰：「有時亦會唔得閒。」
到月底出糧決定去跳番一次晚舞，去到叫秋萍，曰：「今晚來見吓你，一陣我哋出街食消夜直落去開房好唔好？」
秋萍曰：「坐一陣，跳吓舞先，咁早出街有乜好，而且食消夜冇咁早啦。」
到十一點，秋萍覆枱，曰：「陳先生，對唔住，今晚不能同你去街。」
陳翁氣到極，於是另外帶一個冷板小姐白茵出街食消夜又叫酒，邀白茵共飲。
白茵同佢乾一杯之後，曰：「陳先生，我知你今晚心情唔好，
秋萍唔肯陪你出街，我幸蒙青睞，有句話，唔知你喜唔喜歡聽，因為茶舞時你哋都有捧我場，所以我唔客氣講出來，歡場女子，青春有限，眨吓眼就會成為秋後扇，趁青春尚在，搏命賺錢，應該同情，今晚秋萍係陪一個老坑人客去街，目的就係賺錢，你原諒佢啦，因為幾年後，佢就好似我一樣坐冷板矣。」
陳翁對呢番話，有甚深體會，從此絕迹歡場，埋首事業，十幾年後，名成利就，先至再履歡場，果然此時一樣受到歡場脂粉歡迎。
一晚，陳翁去酒家宴會，見到一個掃地阿嬸，叫聲佢陳先生，曰：「認唔認得我？我係白茵呀！」
陳翁曰：「我幾乎唔認得你。」
白茵曰：「我已經嫁人，丈夫現時在廚房部工作，記得秋萍嗎？去探吓佢啦！」
陳翁曰：「都係唔去見佢了。」
一九七五年四月五日