有間酒帘，生意麻麻哋，但係今時今日，能夠做到仍有多少熟客上門，已經唔錯。不少架步，日日拍死成擔烏蠅也，有個人客，上來搵老相好阿燕，大班曰：「阿燕未返工，你想等一陣抑或叫過第二位小姐？」
人客曰：「你介紹另一個小姐啦！」
大班介紹阿芬，人客受落，買鐘入房，問曰：「你做客嘅規矩又係點樣呢？」
阿芬曰：「你係本廳嘅姑爺，冇計，隨便你啦！」
人客曰：「我係咁意畀番三百，你意下如何？」
阿芬曰：「我唔會托人客手（月爭），你畀得出，我亦照收，包你滿意服務。」
人客出完火之後，真係過水三百，阿芬亦冇意見。
過幾日，阿燕嘅人客又到，曰：「你話幾大都要收我五百，但係阿芬收三百都冇計，咁唔啱數噃。」
阿燕曰：「一分錢一分貨，我唔肯減價的。」
人客走後，阿燕同大班訴苦，曰：「阿芬唔應該做到咁賤價錢，做衰咗個場，大家都唔好。」
大班搵阿芬傾吓，問佢是否真係三百都殺？
阿芬曰：「係，有乜唔啱，年晚錢，飯後煙，殺多一文得一文，我冇水過年，問你度，你唔肯度畀我。而且咁做法，對任何人冇影響，搵阿燕嘅人客，亦一樣照舊搵阿燕，否則佢點知我收三百，我想做旺呢個場，我咁做法，對公司有乜唔好？」
大班曰：「咁又係，你有道理。」
阿燕向大班投訴後，冇乜結果，轉而搵阿芬交涉，問曰：「你係咪有心撬我個客，收到爛平爛賤，做衰個場？」
阿芬曰：「唔好嬲啦，我點會搶走你嘅人客，因為我採取山大斬埋有柴嘅辦法，人客多到唔記得，輪米一樣，使乜撬你嘅人客，你話我做爛個場，唔啱係有理由，但你亦要放眼睇吓街外面嘅環境，我哋減價有乜損失，橫掂都係瞓低。」
阿燕曰：「咁又係，世界難撈，我都要鋸低枱腳矣，現時嘅人客係孤寒咗好多。」
一九七五年二月十日