有個撈女，近來生意清淡，求救於一個傍友，因為知道該傍友經常傍住兩三個老細，可作穿針引線。
傍友曰：「阿妹，你想搵幾多？」
撈女曰：「現在時世唔好，唔通我會想發達，求其有人照住，暫時維持生活，已經心滿意足，一個月有六七千已經唔錯，想斬到盆滿缽滿，現在唔係時候。」
傍友曰：「阿妹，你係得嘅，有些撈到眼尾打摺都未化，彈個老細畀佢，斬得少，就牙痛咁聲，你只想六七千，得啦，我替你度掂佢，不過，我嗰份……」
撈女笑曰：「我哋食葱送飯嘅，你放心啦！」
於是，傍友對一個老細曰：「有條正菜，留番畀你，抵食到極，因為佢近來唔係好掂。」
老細曰：「近來食龍肉都冇心機，乜嘢菜都冇胃口。」
傍友曰：「價錢唔貴，五千銀左右，呢個價錢，以前點得？」
老細曰：「咁啦，睇過貨先，如果係靚女，就勉強接受，當係黃連樹下彈琴，苦中作樂，否則慳番。」
傍友介紹老細與撈女見面後，老細認為幾靚女，曰：「都唔錯，我出一千銀。」
傍友曰：「吓？只值一千？成個月包起噃。」
老細曰：「邊個話要玩成個月，我講兩晚，你問吓佢制唔制，唔制就算數。」
傍友回覆撈女曰：「斟成咗，但係只得一千元兩晚。」
撈女曰：「唔賣，一千銀，唔知要來做乜，做鹽唔鹹，做醋唔酸。」
傍友曰：「唔係呀女，你多少都要殺，現時一千銀雖然話冇用，但係要向人度一千就難，而且你可以出齊渾身解數，要佢過完一千又一千，等如打牌，牌風弱之時，雞胡平胡都要食，希望食番旺之後就有自摸爆棚，否則八圈唔開胡，豈不是更難頂？」
撈女曰：「又係道理，好啦，食鋪雞胡先，咁你收幾多？」
傍友曰：「兩舊水啦，你亦知我哋做傍友唔係好易做。」
撈女曰：「我同你冇計，兩舊水就兩舊水，望你彈多個老細畀我。」
一九七五年一月十一日
夏灣拿