方仔追求一個女子，發覺情敵亦追得好交關，而且實力強勁，驚起上來，向老友求教，一個資深老友教佢應該要行外母路線，同時討好女方的姨仔及舅仔，佔領晒各有利據點之後，先至包圍攻擊目標。
此後，方仔去女子家中，必定帶多少禮物，有時送畀伯母，有時送畀世伯，有一次，未來舅仔話想睇波，呢場愉園對流浪，撲飛撲得好交關，盡晒辦法都撲唔到，方仔曰：「你想睇，等我想辦法。」於是，出盡九牛二虎之力，撲咗兩張飛。
未來舅仔大喜曰：「我以為一張，點知有兩張咁威。」
方仔曰：「一個人去睇波冇乜癮，你搵多個死黨老友陪你，如果冇人陪，就我陪你。」
未來舅仔及姨仔係學生，英數都要搵人補習，於是方仔自告奮勇，曰：「我替你補習。」有時去到，女友雖然得閒，但方仔冇約佢去街，先替二人補習，教得十分有心機，伯母十分喜歡，因為請個好補習老師不易。
方仔之情敵，只係向女方進攻，從來未到過女方家，一晚，破例探訪，見到方仔，正在替女方嘅弟妹補習，姨仔十分醒目，曰：「家姐未返來，請坐低等一陣啦。」跟住介紹，指住方仔曰：「呢位係我哋未來姐夫。」
情敵聽見對方稱方仔為未來姐夫，腳都軟晒，知道白費工夫多時，只得撤退，並取消攻勢。
方仔冇咗對手，回復揮灑自如，女方見另一個男友突然失蹤，人影都唔見，以為此人花心，呢頭講得天花龍鳳，嗰頭就走得無蹤無影，反為方仔則成日來探訪，又與家人咁好感情，亦漸漸對佢特別有好感。
一日，方仔求婚，女子曰：「要問過媽媽先。」
方仔把握時機，即刻請伯母出來問聲。
伯母曰：「好，阿女，我都幾喜歡方仔，你哋幾時結婚就揀個好日子啦。」細佬妹妹即刻恭喜家姐，今次可以正式叫姐夫啦。
婚後，方仔先至爆出內幕，全靠姨仔幫手，一聲未來姐夫將情敵嚇走。
嬌妻曰：「唔怪得，原來兩個小鬼被你收買咗。」
一九七五年一月三日
上世紀60至70年代，可以話係香港球壇嘅輝煌歲月。當年入場人次一般為15,000至20,000人，部分賽事更係全場坐爆25,000個位，搞到球場要升起位於四角嘅紅旗，而冇得入場嘅球迷要爬上正民村附近嘅山坡睇波。唔知大家記唔記得當年嘅票價係幾多呢？1973年至1974年票價為3.5元，而1974年至1975年則加價到5元，加幅都幾犀利！