中區之白領，不少於中午時間搭電車到灣仔區解決午茶兼午飯，因為午間之中區食肆，一來太擠迫，二來唔係熟客則十分唔方便，熟客可以留枱，唔係熟客，則有位坐落都可能冇人得閒招呼。
有兩間食肆，伙記出晒名巴閉，專門為熟客服務，偶然至去幫襯一兩次之人，簡直係自己攞嚟賤。
據說，曾有過一個古仔。
有一日，一家四口，到酒家飲茶兼食飯，佢哋唔係常客，伙記認得，此時十一點未夠，距離爆棚時間尚遠，所以能夠搵到位，因為約咗朋友，而朋友未到，於是坐到十二點幾。
伙記頻頻埋來問搵啲乜嘢食吓添，人客曰：「我有分數。」
不久，朋友來到，叫伙記開茶，伙記幾乎唔想理，勉強開多一盅，朋友曰：「呢間嘢貴夾唔好招呼，點解你會來咁臭檔嘅地方飲茶。」
人客曰：「我點知，因為近住你嘅舖頭，就你而已。」
老友曰：「係咁意食兩碟點心啦，其實點心亦貴過人。」
有個伙記聽見佢哋嘅說話，曰：「靚點心嚟，咁嘅價錢唔算貴！你食過人參未？」
人客當堂面色大變，望吓個伙記，一臉鄙視之色，對老友曰：「你帶我女人同埋細路去隔籬街間西餐廳搵個位，我馬上就過來。」
老友曰：「我找數先。」
人客曰：「不必，一陣你至找數，呢處由我搞掂。」
於是，一行五人，先行起身出門。
伙記過來埋單，此時鬼咁好招呼，遞手巾，人客曰：「唔使咁好口，幾多錢，我一個仙貼士都冇。」
伙記玄壇咁面口，寫咗單，人客去櫃面畀完錢，行番轉頭，對伙記曰：「你話我未食過人參？現在我話你知，係，我未食過人參，但我大力丸食得多，你信唔信？」
人客滿面殺氣，伙記開始面青，問曰：「你想點？」
人客曰：「我想你知道我食大力丸。」一拳照心口質過去。人客打完一拳後，放低張紅底，曰：「快啲去執藥。」
一九七四年十二月十七日
「玄壇咁面口」嘅意思係解做啲人黑起塊面，態度相當唔好，或者表情相當嚴肅嘅意思。而呢句說話嘅出處喺邊呢？講法有兩個：（一）
玄壇係指道教中用嚟祭祀嘅高台，因為高台顏色係黑色，所以引伸到形容啲人黑起塊面，就同廣東話「鑊撈咁嘅面口」有異曲同工之處。（二）受封為「玄壇真君」嘅趙公明，形象係黑面濃鬚同粗眉大眼，所以被引用到啲黑埋口面嘅人身上。