今日我哋唔鹹濕，扮吓高深窺探下一下男女性愛進化！所謂性愛，性字雖然行頭，但社會急速發展，性同愛對比，性不斷被輕視，當然有人會反對話，愛都唔見得好噃，係o架，所以你要先睇睇《Sex and Purpose》呢本書！
先旨聲明，全書197頁，超過100頁係悶到發慌，用嚟催眠最有效，如果你睇晒嘅話，咁往後溝女就無往而不利，皆因你可以將性呢樣嘢講到好高層次，唔再停留去你度定我度，時鐘定離島呢啲咁膚淺嘅說話囉！但巴打又唔好以為呢本書純粹係爆房天書，其實佢哲學味濃，將男女分開講述，喺男女平等社會下，父權社會慢慢淘汰，而女權主義不斷抬頭，尤其西方男性嘅陽剛氣被輕視，男子氣概被邊緣化；亦有分析激進女權主義思想，講解傳統主義還是現代主義下，女性有權為自己定義自己方式生活。至於涉及到性方面，作者認為男女各有不同進化目的，但人類係團結在一起，呢點兩性對彼此嘅態度上係同等重要，言下之意係，若然要獲得滿足，男女必要尋找一個「完美伴侶」，然後一齊創造先有真正快樂，否則都只限於技術性高潮，咁唔怪得全球咁多男女要出去偷食啦，原來佢哋有「尋找真高潮」咁偉大嘅理由嘅！
書名：《Sex and Purpose》
售價：約HK$117
撰文：祖