有個唔紅唔黑之女星，搵到一個波士做米飯班主，大力支持，所以冇乜片拍，仍能維持豪華生活，一日，波士太太對丈夫曰：「你都好大膽，原來收埋一個做戲嘅女人同住，你估我唔知？現在我乜都知晒。」
波士曰：「千祈唔好亂講，我係社會上有名譽之人。」
太太曰：「我已經查清楚，姓名住址，乜都有晒，你哋幾時見過面，我都有記錄。」
波士曰：「你九成係叫人偵查我，但我提醒你，受得你錢之人，一定係要冇檳榔都𡁻出汁，你先至畀錢畀得安樂，其實我冇事，係見過明星一面，有個大神，介紹佢來買樓，要我打八折而已，人哋結婚在即，未婚夫係有錢佬，唔好亂咁唱，畀人整封律師信來也。」
太太半信半疑，曰：「總之我唔會放過你。」
波士見情勢險惡，對女星曰：「你快啲搵個人做齣戲，話結婚。」
女星曰：「點解要我結婚？」
波士曰：「幾乎爆大鑊，老婆查出我哋往來，你搵個掛名老公，結咗婚之後，話去度蜜月，其實悄悄返來，我哋就可以繼續往來，以後表面上你名花有主，我就冇晒顧忌，唔使畀老婆對我講俄文矣。」
於是，女星宣布結婚，報紙之娛樂消息刊其事，話婚後去星馬度蜜月。
波士對太太曰：「嗱，你幾乎擺咗大烏龍，人哋成個老公喺度，現在結婚，又入我數。」
太太曰：「又算我錯，但也難怪我起疑心。」
波士曰：「我要去台灣一行，怕你疑神疑鬼，今次同埋你去。」
太太大喜，於是同埋丈夫去台灣，住在大飯店，原來女星早已先到一步，所謂去星馬度蜜月，其實係煙幕。
波士足不出大飯店，卻能與女星歡會，太太則懵然不知，以為丈夫真係去斟生意。
太太陪丈夫去完台灣返來，對丈夫之疑慮盡釋。
波士乃可以經常與女星會面，老婆亦信佢哋冇乜依挹矣。
女星這場戲做得真精彩。
一九七四年十二月八日
「冇檳榔都𡁻出汁」源自廣東話歇後語「冇檳榔都𡁻唔出汁」，解作空穴來風，事出必有因。至於呢度所講嘅「冇檳榔都𡁻出汁」則喺呢句歇後語發展而嚟，意思係指雖無憑證，但都可以作出嚟，即係生安白造，無中生有咁解。話說回來，「檳榔」一詞源於馬來語「Pinang」，原產於馬來西亞，當中嘅檳榔鹼曾被用嚟治療寄生蟲。