名流某翁，金屋藏靚女，每月只能一親芳澤，因為太忙，而且老婆又夠巴辣，但翁年在知命外，亦未能暮暮朝朝也。
年來，翁在股票市場崩大圍，大大唔掂而非小小唔掂，加上經營嘅塑膠廠，因為冇訂單，亦要停工，遣散工人亦冇錢，搞到被工人告到勞工處，只得賤價出售生財工具，呢一鑊，元氣大傷矣。
一日，翁對靚女曰：「我現在大難臨頭，你知啦，俗語有話，大難臨頭各自飛，我哋非分手不可，事實上我亦再冇能力繼續照顧你。」
女曰：「一夜夫妻百日恩，我哋係夫妻，雖然唔見得光，但亦共枕同眠，現在你有難，我點能夠撇開你，唔得，我要同你捱世界，你有錢就畀我，冇錢，我自己搞掂，賣當借都唔麻煩你。」
翁曰：「難得你咁有情義，你暫時捱住先，將來我唔會待薄你。」
靚女以後果然不再向名流伸手，但佢另有奇謀，就係向佢嘅老友度水，張三度一千，李四度二千，撻朵話係某翁之二夫人，老友亦知翁有金屋藏嬌之事，一二千就勉為其難。
一日，女訪翁之老友金老闆，曰：「我丈夫近來好慘，幾乎破產，大概你亦知道我來同你度住一萬銀，唔知你使唔使同我丈夫傾吓。」
金老闆知翁有外寵，但未見過，曰：「好吖，我同佢傾吓電話。」女撥通電話，曰：「我現時在金老闆家中，請你講話。」
翁知道靚女又去度水，接通電話，曰：「金兄，真係煩，我個妾侍又來麻煩你？」
靚女搶住接過電話，曰：「我馬上帶埋錢返嚟。」
金老闆以為真係某翁度一萬銀，乃寫張支票。
靚女憑呢條橋，度咗四五萬之多，翁不能堪，攤牌，要分手。
女曰：「既然你咁無情，亦冇辦法，我又冇要你錢。」
翁曰：「你害到我畀老友唱衰知唔知？你這種做法，你叫我有何面目見人？」
一九七四年十二月六日（夏灣拿）
「妾侍」呢個名詞真係好耐都未聽過，話說喺英國管治香港初期，由於以「華律治華人」為方針，因此容許源自《大清律例》容許納妾嘅婚姻制度。不過經過多年社會諮詢及一夫一妻制宣傳後，1969年7月18日港府終刊登憲報公布「一夫一妻制」婚姻法案，並宣布從1971年10月7日實施《修訂婚姻制度條例》。自此中國式婚姻，包括舊式、新式以及納妾等婚姻形式全部被廢止，但條例實施前的舊式婚姻就可獲豁免。