女主播性感朝聖

對於好多熱愛追逐潮流時尚服飾嘅朋友嚟講，日本原宿可以話係佢哋一生人必去朝聖嘅潮流聖地！至於日本寫真女郎亦有一個聖地，如果能夠去到朝聖的話，咁至能夠凸顯出佢哋喺寫真界嘅地位，呢個地方就係夏威夷喇！最近索爆女主播伊東紗冶子成功完成呢個寫真生涯當中嘅標誌性一步喇！

23歲嘅紗冶子生得清新又甜美，打扮入時亦不失斯文，一睇個樣就知佢知書識禮，學識非淺喇！冇錯，紗冶子喺近畿大學文藝系畢業，但喺佢畢業之前已經廣為人熟悉，事關阿妹曾經參加大學女生選美活動「Miss of Miss Campus Queen Contest」，仲成功奪得冠軍添！畢業後紗冶子入咗電視台做女主播，上年開始水着寫真生涯，向公眾展露其雪白又火辣嘅胴體。

早前，紗冶子去到夏威夷拍寫真照，以製作最新寫真集《SAYAKO》，當中紗冶子會喺優美嘅環境大放性感光芒，凸顯出性感而健康嘅獨特風格，同時亦會記錄低紗冶子學習當地手工藝品製作時認真嘅一面，亦有紗冶子與當地人接觸嘅友善交流場面。