情慾小說唔係得英國嘅出名，其實美國亦有唔少喺英語世界擁有超人氣嘅成人小說作家，而琳達‧霍華（Linda Howard）正係其中一位。呢位喺10歲開始寫小說兼出書，成年後全身投入成人小說創作，並且係「美國羅曼史作家協會」嘅創始會員。憑住綺妮又纏綿嘅情慾故事，佢嘅作品不但備受英語世界歡迎，唔少作品更被翻譯成中文，而呢本《夢中男人》（Dream Man）正係其中之一。呢本情慾小說仍係以琳達拿手的懸疑情慾題材為主線，故事則圍繞具有兇案現場感應能力女主角梅琳，及高超查案能力嘅男主角丹恩發生。喺某個星期五夜晚，梅琳睇完電影歸家途中，腦海突然閃過一把尖利刀鋒，插入一個掙扎人體嘅兇案畫面。
翌日，警探丹恩踏入兇案現場後，發現兇手竟然冇留下任何可供追蹤嘅線索。正當佢苦無頭緒之際，局長要佢跟自稱「靈媒」嘅梅琳見面，而並無抱住任何希望嘅丹恩，卻估唔到面前嘅梅琳竟詭異地講出兇手整個犯案過程，因而令丹恩懷疑梅琳係案件中嘅兇手。雖然丹恩對梅琳有所保留，但為咗查案卻仍然跟對方聯手。經過一段時間相處，丹恩慢慢被梅琳溫柔嘅個性，燃起久違多時嘅慾望。對梅琳嚟講，保護慾十足嘅丹恩卻又令佢肉體產生無比嘅誘惑。突破彼此最後防線嘅兩人，又喺一個星期五晚上接到兇案發生嘅消息，而梅琳嘅異能告知佢兇手嘅真面目，亦因此引嚟媒體爭相報道。不過佢卻發現原來呢個係丹恩嘅計劃，目的係想透過自己引出真兇。究竟丹恩係咪愛自己呢？兇手又匿喺邊度呢？真相嘅暗湧正喺兩人之間蔓延。
書名：《夢中男人》
售價：約HK$100
撰文：魂