男人慾火中燒時，為咗可以喺好短時間內，搵到囡囡解決生理需要，真係可以完全唔使用大腦。早前江門開平市公安局就破獲咗一宗透過網絡招嫖嘅詐騙集團，話說有名姓司徒嘅男子到派出所報案，自稱喺網上被人呃咗萬幾元人民幣，原來呢位司徒男喺手機社交應用程式中搜尋附近嘅人，並喺一堆陌生人中加咗一名外號「美女」嘅人，雖然佢冇講點解要搵「附近嘅人」，但好明顯佢嘅動機唔純正。司徒男指傾談後，對方表示只要畀400元人民幣便會提供性服務，司徒男透過手機支付程式過咗數之後，對方又以「高級會員」、「優惠付款」、「交押金」等理由，要求司徒男再支付逾萬元嘅費用。不過司徒男仍未醒覺，及至對方表示手機出現「安全模式」而唔可以繼續轉帳，並將司徒男刪除好友名單後，佢先至發現自己被人呃錢，而經過警方偵查後，終於將呢個色誘詐騙集團破獲。