千金小姐同管家嘅生活，係唔少日本動漫作品常見嘅題材，就算喺十八禁嘅世界，呢類劇情亦有唔少，可謂玩到悶晒！既然係咁，呢隻由日本成人遊戲製作公司Carol Works所推出嘅最新作品《小姐與悲哀執事》，究竟有乜嘢咁吸引呢？答案好簡單，就係夠萌同夠鹹濕！遊戲中不但一眾女角色萌味十足，就連男主角亦相當可愛，最啱熱愛萌系嘅遊戲迷。雖然呢個遊戲糅合咗愛情同搞笑嘅元素，但講到情慾情節亦有唔少鹽花場面，絕對可以滿足成人遊戲迷嘅要求。
故事講述男主角轟六道本來出生於一戶超級富豪之家，可惜佢個鹹濕老竇衰好色而搞到家道中落，之後仲失埋蹤，自此佢過住流離失所嘅生活。及後，好彩得到一位超級富豪嘅世叔幫助，接咗佢返屋企居住。不過想過平靜嘅生活並唔係咁容易，因為世叔嘅一眾女兒正處於反叛期，因而令父女關係變差，所以世叔希望轟六道做佢哋嘅中間人，幫忙修補父女關係。就係咁樣，轟六道成為一眾千金嘅管家，雖然佢好想做好呢份工，但事情並非如佢所想咁順利，事關一眾千金問題多多，既有潑辣無比，亦有傻頭傻腦成日闖禍，最慘仲有一個有暴力傾向，呢次六道真係唔知點做好喇！
開發商：Carol Works
售價：8,800日圓（約HK$616）
發售日期：現已發售
撰文：魂